தென்னாப்பிரிக்க மகளிர் அணியின் கேப்டனாக வோல்வார்ட் நியமனம்

தென்னாப்பிரிக்க மகளிர் அணியின் முழு நேர கேப்டனாக லாரா வோல்வார்ட் அறிவிக்கப்பட்டுள்ளார்.

பாகிஸ்தான், நியூசிலாந்து தொடர்களில் இடைக்கால கேப்டனாக செயல்பட்ட வோல்வார்ட், தற்போது அனைத்து வகையான போட்டிகளுக்கும் கேப்டனாக அறிவிக்கப்பட்டுள்ளார்.

வங்கதேசத்துக்கு எதிராக தலா 3 ஆட்டங்கள் கொண்ட டி20 மற்றும் ஒருநாள் தொடர்கள் நடைபெறவுள்ளன. இதற்கான தென்னாப்பிரிக்க அணி அறிவிக்கப்பட்டுள்ளது.

மகளிர் பிக்பாஷில் சிட்னி தண்டருக்காக விளையாடும் மரிஸான் கேப்புக்கு டி20 தொடரிலிருந்து ஓய்வளிக்கப்பட்டுள்ளது. ஒருநாள் தொடரில் மட்டும் விளையாடுகிறார். வேகப்பந்துவீச்சாளர் அயபோங்கா காகா, ஆல்-ரவுண்டர்கள் ட்ரியான், நாடின் டி கிளெர்க் ஆகியோர் காயம் காரணமாக விலகியுள்ளார்கள்.

டி20 தொடர் டிசம்பர் 3 முதல் டிசம்பர் 8 வரை நடைபெறுகிறது. ஒருநாள் தொடர் டிசம்பர் 16 முதல் டிசம்பர் 23 இடையே நடைபெறுகிறது.